Skilagreinar
Hér geta launagreiðendur nálgast helstu upplýsingar um hvernig best sé að bera sig að við greiðslur gjalda auk annarra hagnýtra upplýsinga.
Að senda inn skilagreinar
Launagreiðendum ber að senda inn skilagreinar fyrir hvern launamánuð með sundurliðun á öllum iðgjöldum fyrir hvern launþega merkt réttu stéttarfélagsnúmeri. Númer Eflingar er F112.
Hægt er að senda inn skilagreinar með nokkrum leiðum.
Mótframlag atvinnurekanda eftir kjarasamningum
Ath skrunið til hægri til að sjá alla töfluna
| Kjarasamningur | Félagsgjöld Eflingar | Sjúkra- sjóður | Orlofs- sjóður | Fræðslu- sjóður | SSÍ | Félags- manna- sjóður |
|---|---|---|---|---|---|---|
| Almenni vinnumarkaðurinn | 0.70% | 1.00% | 0.25% | 0.30% | – | – |
| Hótel og veitingahús | 0.70% | 1.00% | 0.25% | 0.30% | – | – |
| Sjómenn | 0.70% | 1.00% | 0.25% | – | 0.24% | – |
| Reykjavíkurborg | 0.70% | 0.75% | 0.30% | 0.70% | – | – |
| Faxaflóahafnir | 0.70% | 0.75% | 0.30% | 0.70% | – | 1.00% |
| Orkuveitan | 0.70% | 0.75% | 0.25% | 0.30% | – | – |
| SORPA | 0.70% | 0.75% | 0.30% | 0.70% | – | – |
| Önnur sveitarfélög* | 0.70% | 1.00% | 0.60% | 0.82% | – | 2.15% |
| Ríkissjóður | 0.70% | 0.75% | 0.50% | 0.82% | – | – |
| Rótin | 0.70% | 0.75% | 0.30% | 0.70% | – | – |
| Samtök fyrirtækja í velferðarþjónustu | 0.70% | 0.75% | 0.50% | 0.82% | – | – |
| Samtök sjálfstæðra skóla | 0.70% | 0.75% | 0.30% | 0.70% | – | – |
Leiðir til að senda til okkar skilagreinar má sjá hér:
Skil úr launakerfi
Flest launakerfi bjóða upp á þann möguleika að senda skilagreinar beint til okkar.
Það þarf ekki veflykil (né lykilorð/notendanafn) til að senda skilagreinar til Eflingar, ef kerfið krefst þess að eitthvað sé slegið inn í reitina er það kennitala fyrirtækisins þíns í öllum tilfellum.
Með vefskilum
Fyrir þá sem ekki skila félags- og sjóðsgjöldum beint úr launakerfi er hægt að skila gjöldunum inn í gegnum rafrænt skilagreinaform hér.
Notendur velja hvaða kjarasamningi verið er að skila samkvæmt. Færa þarf inn kennitölur og heildarlaun launþega og mikilvægt er að fara yfir allar upplýsingar áður en ýtt er á „senda“ hnappinn. Kvittun er svo send á netfangið sem gefið er upp. Hvorki er krafist notendanafns né lykilorðs til að skila gjöldum í gegnum vefskil.
Í gegnum laungreiðendavef
Hægt er að senda inn skilagreinar í gegnum laungreiðendavef Eflingar (https://launagreidendur.total.is).
Annað
Hægt er að hafa samband með tölvupósti á netfangið skilagrein@efling.is
Efling óskar eftir því að fá allar skilagreinar sendar með rafrænum hætti.
Frekari upplýsingar má finna hér fyrir neðan
Á þitt starfsfólk að greiða í Eflingu?
Starfssvið Eflingar stéttarfélags nær yfir lögsagnarumdæmi:
- Reykjavíkur
- Kópavogs
- Seltjarnarness
- Mosfellsbæjar og Kjósarsýslu að Botnsá
- Grímsnes og Grafningshrepps
- Hveragerðisbæjar
- Sveitarfélagsins Ölfuss
- Hafnarfjarðar (starfsfólk á veitinga- og gististöðum og við iðnað)
- Garðabæjar (starfsfólk á veitinga- og gististöðum, við iðnað, í heimaþjónustu og starfsfólk Vífilsstaða)
Félagsfólk Eflingar starfar á áður nefndum svæðum og vinnur við eftirtaldar og aðrar hliðstæðar starfsgreinar:
a) Við fermingu og affermingu skipa og hvers konar annarra flutningstækja svo og móttöku og afhendingu farms.
b) Við húsbyggingar og efnisflutninga vegna byggingaframkvæmda.
c) Við hafnargerð, vegagerð, skurðgröft, landbúnaðarstörf og efnisflutninga sem tengjast áðurnefndum starfsgreinum.
d) Í þjónustu ríkis og sveitarfélaga.
e) Í heimaþjónustu, á leikskólum, við umönnun á sjúkrahúsum og stofnunum, í þvottahúsum og saumastofum sjúkrastofnana.
f) Við ræstingar, hreinlætisstörf, efnalaugar og þvottahús.
g) Við mötuneytisstörf.
h) Við varðstörf, öryggisvörslu og fjármunaflutninga.
i) Á veitinga- og gististöðum.
j) Við vinnslu og sölu sjávarafurða og landbúnaðarafurða.
k) Í iðnaði og í verksmiðjum svo sem járnsmíði, skipasmíði, blikksmíði (tunnugerð), garðyrkju, byggingar- og þungaiðnaði.
l) Við móttöku og afhendingu vara, þar með taldir bifreiðastjórar.
m) Við olíu-, bensín-, smur-, bón- og ryðvarnarstöðvar og hjólbarðaverkstæði.
n) Við stjórn vöruflutningabifreiða í þjónustu annarra og við stjórn á stórvirkum vinnutækjum, svo sem ýtum, vélskóflum og vélkrönum.
o) Við orkufrekan iðnað, jarðgangnagerð, virkjanir og aðrar stórframkvæmdir sem eru sambærilegar og við hliðstæðar nýjar starfsgreinar.
p) Við hvers konar önnur framleiðslu- og flutningastörf.
q) Við sjómannastörf og siglingar
Leiðréttingar á áður sendum skilagreinum
Ef launagreiðandi þarf að gera leiðréttingar á eldri skilagreinum sem hafa verið sendar inn er nauðsynlegt að senda póst á skilagrein@efling.is. Aðeins er hægt að leiðrétta 3 mánuði aftur í tímann.
Skilagreinar aftur í tímann
Aðeins er tekið við skilagreinum 3 mánuði aftur í tímann. Hægt er að hafa samband í tölvupósti (skilagrein@efling.is) ef þörf er á að senda skilagreinar lengra en 3 mánuði aftur.
Hvernig eru skilagreinar greiddar
Greiðsluseðill er sendur í heimabanka eftir að skilagrein hefur verið send til Eflingar. Krafan stofnast þó ekki fyrr en skilagreinin hefur verið yfirfarin og ef misræmi kemur í ljós stofnast krafan samkvæmt yfirfarinni skilagrein.
– Ef krafa stofnast ekki í heimabanka hefur skilagrein ekki borist af einhverjum ástæðum.
Hvenær á að greiða skilagreinar?
Gjalddagi er 15. dagur næsta mánaðar á eftir launamánuði.
– Eindagi er síðasti virki dagur sama mánaðar. Ef greiðsla er ekki innt af hendi fyrir eindaga eru reiknaðir dráttarvextir frá gjalddaga til greiðsludags.
Ef skilagrein er ekki greidd?
Innheimtuferlið hefst ef iðgjöld eru ekki greidd á eindaga. Áminning er send 7 dögum eftir eindaga og innheimtuviðvörun 15 dögum eftir eindaga. Hafi krafa ekki verið greidd 11 dögum eftir innheimtuviðvörun er hún send í löginnheimtu.
Dæmi um iðgjöld vegna apríl mánaðar:
- Gjalddagi er 15. maí.
- Eindagi er 31. maí.
- Áminning send 6. júní.
- Innheimtuviðvörun send 14. júní þar sem er gefinn 11 daga frestur.
- Vanskilin send í löginnheimtu þann 25. júní sé krafan ekki greidd.
Hvert má beina fyrirspurnum?
Allar spurningar má senda á netfangið skilagrein@efling.is
