Starfsafl

Starfsafl styðst við flokkun fræðsluaðila við skilgreiningu á því hvaða fræðsla fellur undir almennt starfsnám sbr. eftirfarandi: Afmarkaður hluti náms sem fylgir fyrir fram ákveðinni áætlun eða skilgreiningu og lýkur yfirleitt með vottun á frammistöðu eða annars konar staðfestingu.

Skilgreining og uppbygging fræðslu

Hugtakið fræðsla er notað til einföldunar á þessari síðu yfir allt nám, námskeið og erindi, hvort heldur hún fari fram innan eða utan vinnutaða eða í gegnum fjarfundabúnað eða upptökur.

Uppbygging fræðslu:

1. Hafa skýrt afmarkað upphaf og lok

2. Hafa skilgreind markmið og efnistök

3. Vera kennt af leiðbeinanda sem býr yfir viðeigandi hæfni og þekkingu

Að fræðsla uppfylli þessi skilyrði er nauðsynlegt, en ekki eitt og sér nægjanlegt til að tryggja styrkhæfi.

Í þessu felst að hægt sé að nálgast upplýsingar á heimasíðu fræðsluaðila eða á öðrum tilgreindum vefmiðli sem og upplýsingar um menntun, hæfni og reynslu leiðbeinanda.

Viðmið um leiðbeinendur

Almennt er gert ráð fyrir því að þeir sem annast fræðslu fyrir einstaklinga og vinnustaði búi yfir viðeigandi menntun, hæfni og reynslu sem hæfir því efni sem boðið er upp á.  

Leiðbeinendur skulu hafa faglega þekkingu og færni á viðkomandi sviði og geta sýnt fram á hæfni sína með viðeigandi gögnum, s.s. námsferli, starfsreynslu eða öðrum hæfnisvottunum, sé kallað eftir því. Athugið sérstaklega auknar kröfur til þeirra sem kenna íslensku.

Upplýsingar um leiðbeinanda skulu vera skýrar og aðgengilegar fyrir þátttakendur og sjóðinn, og vera hluti af umsóknarferli fyrirtækja til sjóðsins á www.attin.is: almennar upplýsingar um nám/námskeið.

Á við um allt nám, námskeið og einkakennslu. Aðgangur að öppum í íslensku eru einnig styrkhæf falli þau að viðmiðum sjóðsins um starfstengt nám.

Leiðbeinandi íslenskunámskeiða, íslenskunáms eða einkakennslu sem starfar annarsstaðar en hjá viðurkenndum fræðsluaðila samþykktum af Mennta- og barnamálaráðuneytinu eða Félags- og vinnumarkaðsráðuneytinu,  verður að búa yfir neðangreindum hæfnikröfum og reynslu svo þjónusta viðkomandi teljist styrkhæf af starfsmenntasjóðum.

Aðrar hæfnikröfur:

• Marktæk þekking á kennslu tungumála

• Reynsla af kennslu frá viðurkenndum fræðsluaðila

• Lokið námi á háskólastigi

• Fagleg vinnubrögð og metnaður til að skila góðri vinnu

Tilgreindar hæfnikröfur leiðbeinanda eiga einnig við um annað tungumálnám.

Umsókn er hafnað ef ofangreindar kröfur um viðmið, hæfi og hæfni eru ekki fyrir hendi.  

Nám sem tekið er á Íslandi

Nám í hverskonar fegrunarfræðum sem tekið er hérlendis og telst ekki til löggildra iðngreina þarf að falla að viðmiðum sjóðsins um starfstengt nám og vera tekið hjá skólum eða snyrtistofum með starfsleyfi til að nemendur geti sótt um starfsmenntastyrk vegna námsins.

Vörupakkar og annað námsefni sem innifalið er í námskeiðsgjaldi, er ekki styrkt. Því er aðeins tekið við reikningum sem sýna sundurliðun á kostnaði. 

Sé námið tekið hjá skóla eða snyrtistofu sem ekki er með starfsleyfi geta nemendur aðeins sótt um lífsleiknistyrk (tómstundastyrk).

Nám sem kennt er erlendis

Allt nám í fegrunarfræðum sem kennt er erlendis er ekki styrkt sem starfsmennt en nemendur geta sótt um lífsleiknistyrk vegna námsins (tómstundastyrk).

Skilgreiningar á fegrunarfræðum

Hér er notast við orðið fegrunarfræði þar sem orðið snyrtifræði nær yfir löggilda iðngrein.  Þessi regla nær yfir allt annað nám sem telst til fegrunarfræða en hefur ekki hlotið löggildingu hér á landi, samanber eftirfarandi upptalningu:

1. Förðun

2. Naglalist, þ.m.t. ásetning gervinagla

3. Augnaháraásetningar, augnaháralengingar

4. Varanleg förðun á augabrúnir

Athugið að listann er mögulega ekki tæmandi.

Skólar sem kenna fegrunarfræði þurfa að uppfylla eftirfarandi skilyrði svo það nám sem þeir bjóða sé styrkt sem starfsnám:

• Hafa starfsleyfi og texta sem tiltekur það sýnilegan á vefsíðu og geta framvísað skírteini sé þess óskað.

• Hafa alla reikninga sundurliðaða þar sem  skýrt kemur fram kostnaður vegna náms og varnings.

• Uppfylla skilyrði sjóðsins um starfsnám,

• Veita nemanda diplómu / viðurkenningarskjal í lok náms.

Hægt er að sækja um starfsmenntastyrk vegna náms hjá eftirfarandi fræðsluaðilum:

• Reykjavík Makeup School.

• Glam

• Make up studíó Hörpu Kára

• Deja Vu Nails Salon & Academy

• Lilly nails Iceland

• Magnetic

• Shimmer

• Crytal nails

• Amber Lashes

Skólar sem uppfylla skilyrði en eru ekki á listanum hér að ofan geta haft samband við skrifstofu Starfsafls.

Reikningar þurfa að vera sundurliðaðir ef í þeim felst kostnaður umfram beina fræðslu. Þetta er nauðsynlegt svo hægt sé að meta hvort sá kostnaður sé styrkhæfur.

Hvað er styrkt:

• Starfstengd fræðsla sem fram fer fyrir hóp starfsfólks eða einstaklinga

• Starfstengd fræðsla sem fram fer á íslenskum vefsíðum 

• Tungumálanám

• Prófa- og skírteinisgjöld sem órjúfanlegur hluti af námi /námslokum

• Starfstengd markþjálfun sem nemur að hámarki 12 tímum innan almanaksárs.  Með umsókn þurfa að fylgja upplýsingar um markþjálfann en skilyrt er að markþjálfinn hafi lokið námi í markþjálfun frá viðurkenndum skóla.  Þá verður fjöldi tíma að koma fram á reikningi. 

• Túlkaþjónusta á starfstengdu námskeiði fyrir hóp starfsfólks á vinnustað þar sem greitt er fyrir hvorutveggja 

Hvað er ekki styrkt:

• Ráðgjöf eða handleiðsla 

• Túlkaþjónusta fyrir einstaklinga (t.d. í prófum eða á starfstengdum námskeiðum utan vinnustaðar – maður á mann).

• Ferðakostnaður sbr. akstur eða flug

• Gisting og uppihald

• Veitingar á námskeiðum

• Gjald eða kostnaður sem til fellur vegna innleiðingar eða utanumhalds fræðslu

• Sýnatökur, kannanir og þarfagreiningar

• Vörupakkar sbr. nám í fegrunarfræðum

• Vinnustofur sem snúa að stefnumótun, framtíðarsýn eða innri greiningu á starfsemi viðkomandi vinnustaðar falla ekki undir skilgreiningu formlegrar fræðslu eða námskeiðahalds. Í slíkum tilvikum er að jafnaði um að ræða vinnu sem miðar að því að meta, skilgreina og móta innri starfsemi, verklag eða stefnu, fremur en að miðla þekkingu, þjálfa færni eða stuðla að hæfniþróun starfsmanna með formbundnum hætti.

*Athugið að listarnir er mögulega ekki tæmandi.

Nám verður að kosta að lágmarki 200.000,- kr.

Reikningur getur verið á nafni félagsmanns eða fyrirtækis.  

Félagsmaður sækir um styrkinn hjá Eflingu og fyrirtækið sækir um á vefgátt sjóða,  www.attin.is 

Með báðum umsóknum  þurfa eftirfarandi gögn að fylgja:

• Lýsing á námi

• Reikningur.  

• Staðfesting á greiðslu

• Yfirlýsing fyrirtækis og einstaklings vegna sameiginlegrar umsóknar, sjá eyðublað hér.

Við samþykkt umsóknar dregst styrkupphæðin af rétti beggja.

Þegar reikningur er á nafni félagsmanns þá er fyrst nýttur réttur félagsmanns og síðan fyrirtækis, þar til hámarki er náð. Þegar reikningur er á nafni fyrirtækis þá er fyrst nýttur réttur fyrirtækis og síðan félagsmanns, þar til hámarki er náð

Styrkur til félagsmanns greiðist inn á reikning félagsmanns og greiddur styrkur fyrirtækis greiðist inn á reikning fyrirtækis.

Við afgreiðslu umsóknar til fyrirtækis er höfð til hliðsjónar greidd styrkfjárhæð til félagsmanns. 

Til skýringa:

Athugið að styrkur til fyrirtækis getur aldrei orðið hærri en 300.000,- 

Styrkur til einstaklings getur aldrei orðið hærri en 130.000,- eða 390.000,- ef um uppsöfnun er að ræða.  Athugið einnig að styrkur getur aldrei orðið hærri en 90% af reikningi.

Samanlagður styrkur er 90% af námsgjaldi – hámark 430.000 kr. (ef félagsmaður á aðeins 130.000,- rétt og fyrirtæki 300.000,-) eða 690.000 kr. þegar félagsmaður á rétt á uppsöfnun (þá 390.000,- til félagsmanns og 300.000,- til fyrirtækis).

Athugið að um tilraunaverkefni er að ræða, með fyrirvara um villur.  Starfsafl áskilur sér allan rétt til leiðréttinga og breytinga.